Friday, January 27, 2012

யானைப் பசிக்கு சோளப் பொரியா,ரஜினி?

அன்புள்ள சூப்பர் ஸ்டாருக்கு,
வணக்கம் பல!
உங்களின் உச்சம் தொட முடியாமல் தமிழ் நடிகர்களே திணறி கொண்டிருக்கிறார்கள்.
உண்மைதானே!
நீங்கள் தமிழர் பிரச்னைகளுக்கு ஆதரவா,எதிர்ப்பா எத்தகைய நிலை எடுப்பீர்கள்  என்பது இன்னமும் புரியாமல்  மக்கள் மண்டை காய்ந்து போயிருக்கிறார்கள். ஒகேனக்கல் பிரச்னையில் கன்னட சகோதரர்கள் கண்டித்ததுமே நீங்கள் நிபந்தனை இல்லாமல் அவர்களிடம்  மன்னிப்பு கேட்டவர் என்பது தமிழர்களுக்கு தெரியும்.அதைத் தான் சொன்னேன்!
எமது மக்கள் சினிமாவுக்கு அடிமையாகிப் போனவர்கள்.தர்மர்  வேஷம் போட்டவர்களை உண்மையான தர்மராகவே  நினைத்து வணங்கிவிடுவார்கள்.எவ்வளவு நல்லவராக நிஜ வாழ்க்கையில் வாழ்ந்தாலும் வில்லன் வேஷம் போட்டால் அவன் காலி!அவனை வில்லனாகவே நினைத்து வெறுப்பினால் ஒதுக்கிவிடுவார்கள்.
எவ்வளவோ உதாரணம் உண்டு.
எதற்கு இவ்வளவு வியாக்கியானம் என்கிறீர்களா?
தானே புயல் நிவாரண நிதியாக முதல்வர் ஜெயலலிதாவிடம் பத்து லட்சம் கொடுத்திருக்கிறீர்களே,அந்த தர்ம சிந்தனைக்குத்தான் இவ்வளவும்!
இவ்வளவு மிகப் பெரிய தொகையை இத்தனை நாட்கள் கழித்துக் கொடுத்திருக்கிறீர்களே,கர்ணன் தோற்றான் போங்கள்!
நீங்கள் எத்தனை கோடி வாங்குகிறீர்கள்,அதில் இந்த தொகை எவ்வளவு சிறியது என்பது உங்களுக்கு தெரியாதது அல்ல!
இந்த பத்து லட்சம் உங்களுக்கு ஜுஜூபி!
வாழ்வாதாரங்களை அடியோடு இழந்து நிற்கும் எம்மவரை தமிழக அரசு கை விடாது.
என்றாலும் நிதி மிகுந்தவர் பொற்குவை கொடுப்பது அரசினரின் நிவாரண  வேலைகளுக்குஉதவியாக இருக்க வேண்டுமல்லவா?தமிழ்ப் பால் குடித்து  வளர்ந்ததாக பெருமையுடன் சொல்லும் நீங்கள் கிள்ளியா கொடுப்பது?அள்ளிக் கொடுத்திருக்க வேண்டாமா?
'ரஜினியே அவ்வளவுதான் கொடுத்திருக்கிறார்,அவருக்குமேல் நாம் கொடுத்தால்  மரியாதையாக இருக்காது என்று  மற்றவர்கள் தப்பித்துக் கொள்வதற்கு  வழி காட்டி இருக்கிறீர்கள்!
நீங்கள் அரசியலுக்கு வந்தால் தமிழ்நாட்டை வாழ வைப்பீர்கள்  என்று இன்னமும் நம்பிக் கொண்டிருக்கிற அப்பாவி ரசிகர்களை நினைத்தால் தான் கவலையாக இருக்கிறது.என்ன செய்வது ?
லட்சக் கணக்கில் ஈழத்தமிழர்கள் கொல்லப் பட்டபோது என்ன செய்தீர்கள் என்று  உங்களை அதட்டி கேட்கும் மனம் இல்லாமல் ஊமையாய் வாழ்ந்த  ஜடங்கள் நாங்கள்!

அன்புடன்,
தேவிமணி.

No comments:

எடப்பாடியும் ஓபிஎஸ்சும் மோதல்.கோமாளி தேசமாகிறது.!

வலைப்பூ வாசிப்பாளர்களே,                வணக்கம். வீட்டு விஷேசங்களுக்கு வருகிற சொந்தங்கள் " உங்க ஊர்ல டெங்கு எப்படி இருக்கு, எத்தனை பேர...