கமல்-ரஜினி இணைந்து போட்டியிடுவார்களா?

"உலகநாயகன் கமல்ஹாசனை சூப்பர் ஸ்டார் ரஜினிகாந்த் வருகிற நாடாளுமன்றத் தேர்தலில் ஆதரிப்பாரா?"
எல்லோரும் சொல்வதைப் போல இது மில்லியன் டாலர் கேள்வி மட்டுமல்ல.ஒட்டு மொத்த தமிழக மக்களின் எதிர்பார்ப்பும் ஆகும்.!
இது நடக்குமா,சாத்தியம் இருக்கிறதா,?
நடந்தால் அது வரலாற்று மாற்றம்.
என்ன இருந்தாலும் ரஜினிகாந்த் பிஜேபி மோடியின் ஆதரவாளர் .அவர் எப்படி மோடியை எதிர்ப்பவரை ஆதரிப்பார்? ரஜினியை நம்பித்தானே பிஜேபி தனது அடித்தளம் அமைவதற்கான வேலையில் ஈடுபட்டிருக்கிறது?
அதிமுக கூட்டணியில்தான் ஐந்து இடங்கள் பெற்றிருக்கிறது என்று இபிஎஸ்-ஓபிஎஸ் சொன்னதை பிஜேபி தலைவர் அமித்ஷா ஓங்கி அடித்து "அப்படி இல்லை! எங்களின் தேசிய ஜனநாயகக் கூட்டணியில்தான் அதிமுக சேர்ந்திருக்கிறது!"என்றெல்லவா திருத்தம் சொல்லிவிட்டுப் போயிருக்கிறார்.
அவரது நண்பர் ரஜினி காந்த் என்பதை இங்கு நினைவில் கொள்க.
"பாஜக-அதிமுக கூட்டணியில் சேருகிற வாய்ப்பே மக்கள் நீதி மய்யத்துக்கு இல்லவே இல்லை" என்று சொல்லிவிட்டார். அழுத்தம் திருத்தமாக "திமுக  அணியிலும் சேரப் போவதில்லை.நாற்பதிலும் தனித்தே போட்டி "என்பதையும்   சொல்லி இருக்கிறார்.
"திமுக, அதிமுகவுக்கு மாற்றாக நாங்கள் ஒரு அணி’ என்றுதான்"கமல் கூறினார்
"மூன்றாவது அணி அமைகிற வாய்ப்பு இருக்கிறது என்பதாக " மீடியாக்கள்தான் கூவின

 

அவரது இயக்கத்தின் முதலாவது ஆண்டு நிறைவு விழாவில் கமல் பேசியபோது"யாருடன் சேர்ந்தால் ஓட்டு வரும்,யாருடன் சேர்ந்தால் பணம் வரும் என்பதை சிந்திக்காமல் மக்கள் நலம் கருதியே பேசி வருகிறேன்" என்று சொன்னது பா.ம.க.வை நினைத்துத்தான்  என்பதை அரசியல்வாதிகளால் புரிந்து கொள்ள முடியாதா என்ன?

அதே நேரத்தில் ரஜினி,சீமான் ஆகியோரது ஆதரவு இருந்தால் நல்லது"என்பதை அவர் கோடிட்டுக் காட்டத்தவறவில்லை. 
ஆனால் ரஜினி ஆதரிப்பாரா? தனது பிஜேபி ஆதரவு நிலையை அறுத்து எறிந்து விட்டு வருவாரா?
வந்தால் நல்லது.
கமல்-ரஜினி இருவரும் மாபெரும் சக்திகள் .இணைந்தால் தமிழகத்துக்கு நல்லது.
ரஜினி தனது வலதுசாரித் தன்மையையும்,கமல் அவரது இடதுசாரித்தன்மையையும் மறந்து விட்டு ஒன்று சேர்ந்தால்  தமிழகம் புத்தொளி பெறும். 
டிவிட்டர் இணையதளத்தில் இருவரும் பரிமாறிக்கொண்ட  வாழ்த்துச்செய்திகள் வார்த்தைகளாக இல்லாமல் உயிரானவையாக இருக்குமேயானால் நிச்சயம் விடிவுகாலம்தான்! தமிழகத்துக்கு தேவையான எல்லாமுமே வந்து சேரும்.புதுயுகம் பிறக்கும்.
,"கட்சி ஆரம்பித்து,இரண்டாம் ஆண்டில் அடியெடுத்து வைத்து,தேர்தலில் முதல் முறையாக போட்டியிடப்போகும் மக்கள் நீதிமய்யத் தலைவர் என் நண்பர்கமல்ஹாசன் அவர்கள், பொது வாழ்விலும் வெற்றிபெற என் மனமார்ந்த நல்வாழ்த்துக்கள்" என ரஜினி குறிப்பிட்டு இருந்தார் .

 

ரஜினிக்கு நன்றி தெரிவித்து கமல் "எனது 40 ஆண்டுகால நண்பரே .நல்லவர்  துணை நின்றால் நாற்பது எளிதே .நாளை நமதே."என்றும் குறிப்பிட்டிருக்கிறார்.

இதன் பொருள் என்னவென்பது சூப்பர் ஸ்டாருக்குத் தெரியாதா?

நீங்காத நினைவுகள்.2. சிவாஜி நடத்திய கல்யாணம்

"அழவும்,கூடவே சிரிக்கவும் அதை விட காதலை கண்களில் காண்பிக்கவும் கற்றதெங்கே, சொல்லலாமா?"


காதல் இளவரசன் என மக்களால் கொண்டாடப்பட்ட கமல்ஹாசனிடம் ஒருவர் கேட்கிறார்.


அதற்கு அவர் சொல்கிறார்.


"வாழ்க்கையில் சந்தித்த மனிதர்களிடம்,  பார்த்த படங்கள் இவைகளிடம் இருந்து அழுகை -சிரிப்புகாம்பிநேஷன் முதலில் பார்த்தது திரு.சிவாஜியிடம்,திருமதி சாவித்திரியிடம்.!"
ஆக கற்றதெல்லாம் பள்ளிப்படிப்பு அல்ல. அவரது ஆசான் மனிதர்கள்.


ஆணழகன் என்று புகழப்படுகிற கமலை சினிமாவில் நடிப்பதற்கு தகுதி இல்லை என ஒதுக்கியதும் உண்டு. 


"இந்த மூஞ்சி எல்லாம் நடிக்க லாயக்கில்லைன்னு என்னை ஒதுக்கியது உண்டு.சினிமாவில் நுழைஞ்சதும் டைரக்சன் துறையில தீவிர ஈடுபாட்டுடன் இருந்த என்னை பாலசந்தர் சார் மாதிரி உள்ளவங்க 'இந்த மூஞ்சிய படம் பிடிக்கலாம்'னு நெனச்சதினாலதான் நடிகனானேன்."என ஒரு பத்திரிகையில் எழுதி இருக்கிறார் கமல்.


இனி தொடருக்கு வரலாம்.


"இரண்டாவது குழந்தை பிறகே திருமணம் பற்றி தீர்மானித்தேன்.திருமணத்தின் விளைவாக உருவானவள் என்பதை விட ஸ்ருதியை எங்களுடைய ஆழமான அன்பின் அடையாளமாகவே நான் கருதுகிறேன்.வீண் சடங்குகளை விட இந்த குழந்தை எங்களுடையது என்கிற உணர்வே முக்கியமானது"என்றார் சரிகா.

அடுத்து வருவதை வாணிக்கு சொன்னதாகவே எடுத்துக் கொள்ளலாம்.



"திருமண வாழ்க்கை ஒழுங்காக அமைய வேண்டுமானால் கணவனை மனைவி மதித்து வாழ வேண்டும்.கணவனை விட நான் மேலானவள் என்கிற அகம்பாவத்துடன் பிறர் மத்தியில் கணவனை இழிவாக நடத்திவிட்டு அதன் பிறகும் அவன் உங்களை நேசிக்கவேண்டும் என்றால் அது எப்படி நேர்மையானதாகும்?


என்னைப் பொருத்தவரை கமல்ஜியின் காலைத் தொட்டு வணங்குவதை தாழ்வானதாக கருதவில்லை.நான் மரியாதையும் அன்பும் வைத்துள்ள மாமனிதர் அவர். என்னைவிட மூத்தவர்.ஒருவருக்கு மரியாதை காட்டுவதால் நாம் தாழ்ந்து விட மாட்டோம்."என்கிறார் சரிகா.


சரிகாவின் திருமண விருப்பத்தை கமலிடம் சொன்னதும் அவரும் சரியென ஒப்புக்கொண்டார். அவரது தந்தை சீனிவாசன் அவர்களிடம் சம்மதம் பெற்றார். 


நடிகர் திலகத்திடம் வந்து திருமணத்தை நடத்திக் கொடுக்கும்படி கேட்டுக் கொண்டார்.


 ராம்குமார்,பிரபு இவர்களுடன் சிவாஜியின் மடியில் உரிமையுடன் அமர்ந்து வளர்ந்த அன்னை இல்லத்தின் மூத்த பிள்ளை கமல்தான்.


"டே ...கமலா" என்றுதான் சிவாஜி  அழைப்பார். அந்த 'டே'யில் அழுத்தம் இருக்காது.அது ஒரு ஓசை சொல்லாகத்தான் இருக்கும்.


தேவர் மகன் படத்தில் சிவாஜிதான் நடிக்கவேண்டும் என்பதில் கமல் பிடிவாதமாக நின்று 3 நாட்கள் வாதாடித்தான் சம்மதம் வாங்கினார். கால்ஷீட் வாங்கத்தான் அவரை வலியுறுத்த வேண்டியதாக இருந்தது.ஆனால் கல்யாணத்தை நடத்தி வைங்கண்ணே என்று கேட்டதும் உடனே ஒப்புக் கொண்டு விட்டார். 


கமல்ஹாசனின் இல்லத்தில் கல்யாணம். 


சிவாஜி கணேசன்,திருமதி கமலா அம்மாள்,ராம்குமார், இவரது மனைவி கண்ணம்மாள், பிரபு படப்பிடிப்பில் வெளியூரில் இருந்ததால் அவரது மனைவி புனிதவதி பிரபு ,ஆகியோர் கலந்து கொண்டு திருமணத்தை நடத்தி வைத்தனர்.

திருமாங்கல்யத்தை சிவாஜி,கமலா தம்பதி எடுத்துக் கொடுக்க கமல்ஹாசன் அதை வாங்கி சரிகாவுக்கு கட்டினார்.
மிகப்பெரிய பாக்கியம்.


இதைப் போல  எனது மூத்த மகன் ராம்குமார்-பானுமதி திருமணத்தை சிவாஜியும் கமலா அம்மாவும் வந்திருந்து நடத்திக் கொடுத்தனர். சிங்கப்பூரில் இருந்து இந்த திருமணத்துக்காகவே வந்தனர் என்பது குறிப்பிடத்தக்கது.


சொந்த வீடு இருந்தும் வாடகை வீட்டில்தான் கமல்-சரிகா இருவரும் குடும்பம் நடத்த வேண்டிய நிலை.இதை முன்னரே சொல்லி இருக்கிறேன். 


கஸ்தூரி ரங்கன் சாலையில் நடிகை ஹேமமாலினிக்கு சொந்தமான வீட்டில் வாடகைக்கு இருந்தார்கள். ஆழ்வார்பேட்டை வீட்டில் இருந்த அத்தனை பொருட்களும் எடுத்துச்செல்லப்பட்டு இருந்தன.யாரால் என்பதை நீங்களே ஊகித்துக் கொள்ளுங்கள்.


மாளிகை மாதிரி சொந்த வீடு இருந்தும் வாடகை வீட்டில் வாழ்ந்தபோதுதான் ஸ்ருதிஹாசன் பிறந்தார்.


ஒருநாள் திடீரென கமலிடம் இருந்து போன்.


"கொஞ்சம் வீட்டுக்கு வரீங்களா?"


உடனே புறப்பட்டு சென்றேன்.


"ஆஸ்பிடல் வரை போயிட்டு வரேன். அவங்களை ( சரிகா.) அட்மிட் பண்ணிருக்கு"என்று சொல்லிவிட்டு ஒரு வாடகைக் காரில் புறப்பட்டுப் போனார். 

சொந்தக்கார் அன்று அவர் வசம் இல்லை.


ஹேராம் படப்பிடிப்பில் கணவன் மனைவி இருவரும் கடுமையாக உழைத்ததை அருகில் இருந்து பார்க்கிற வாய்ப்பு எனக்கு கிடைத்தது. அந்த படத்தில் நடித்தவர்களை பேட்டி எடுத்து அதை தொகுத்துக் கொடுக்கும் பொறுப்பு எனக்கு தரப்பட்டிருந்தது.                                                              
கலைஞன் படப்பிடிப்பின் போது ஒரு நிகழ்வு.
அதை நாளை மறுநாள் பார்க்கலாம்.
---தேவிமணி 

எல்.கே.ஜி..விமர்சனம்.

இன்றைய அரசியல் நிலவரம்,கலவரம்,அந்தரங்கம்  இவைகளை   நிர்வாணமாக்கி நடுரோட்டில் ஓட விட்டிருக்கிறார் லால்குடி கருப்பையா காந்தி. பெயர் சுருக்கமே எல்.கே.ஜி.

சர்காரில் இலவசங்களை இழிவு படுத்தினார்கள் என்று சொல்லி ஆர்பாட்டம் செய்தவர்கள் எல்.கே.ஜி.க்காக என்ன பண்ணப்போகிறார்கள். அவர்களைத்தான் பாலாஜி நாறடித்திருக்கிறார் .! வசனங்களில் வகை வகையான கிண்டல்கள்.ரசிக்க முடிகிறது.தொடக்கமே பினாமி ஆட்சி ஒழிக என்றுதான் தொடங்குகிறது.

ஒரு கட்சியைக் கூட விட்டு வைக்கவில்லை. தொண்டன் அறை வாங்கிய தியாகத்தையும் காட்டுகிறார்கள். மீடியாக்கள். மீம்ஸ் கிரியேட்டர்களையும் மரண கலாய். இப்படித்தான் மீடியாக்களின் கேள்விகள் என நக்கல் செய்வதற்கும் துணிச்சல் வேண்டும். 

கதை என்பதை அற்ப ஜந்துவாக்கி விட்டதால் பெரிதாக சொல்வதற்கில்லை. கோர்வையான திரைக்கதையும் இல்லை.

நாஞ்சில் சம்பத்தை வைத்து மேஜிக் காட்டப்போகிறார்கள் என்றால் பாவம் அவரை வாயில் காப்போன் அளவுக்குத்தான் வைத்திருக்கிறார்கள். குறள் சொல்வதற்கு சம்பத் வேண்டுமா என்ன?ஒரு சரித்திர ஆசிரியரை நாற்காலியுடன் பிணைத்து விட்டீர்களே பாவிகளா!

முதலமைச்சராக ராம்குமார் கணேசன்.அப்படியே அப்பாவின் சாயல்.அவரது கம்பீரக்குரல்.இந்த வாரிசை  பட்டைத் தீட்டப்படாத வைரமாக பாதுகாத்து வந்திருக்கிறார்கள்.

கார்ப்பரேட் கிரிமினல்கள்,இந்திய தேர்தல்களில் அந்நிய சக்திகளின் வியூக உதவிகள் ,உள்ளூர் அரசியல் வாதிகள் ,சமாதி சத்தியங்கள், கட்சிக்குள் கலவரம்,எல்லாவற்றையும் தோல் உரித்துக் காட்டியதற்காக பாலாஜிக்கு கலைமாமணி விருது வழங்கவேண்டும். 

அமரர் எம்.ஜி.ஆர்.படப்பாடல்கள் காலம் கடந்தும் நிற்கிறது.
"எத்தனை காலம்தான் ஏமாற்றுவார் இந்த நாட்டிலே " என்கிற அவரது பாடல் அவரது கட்சிக்கே பொருந்திப் போகும் என்பதை மக்கள் திலகம் நினைத்துக்கூட பார்த்திருக்க மாட்டார். 

மேடைகளில் எதிரிகளை கிழிக்கும்  கே.ராஜனின் மகன்தான் இயக்குநர் கே.ஆர். பிரபு.  நாயகன் பாலாஜியின் வால்யூமை சற்றே குறைக்கத் தவறி விட்டார். 

வடிவேலுக்காக சீமான் பேச்சு வார்த்தை.

ஷங்கரின் இம்சை அரசன் இரண்டாம் பாகத்தில் நடிப்பதற்காக ஒப்புக்கொண்டு கோடிகளில் பணம் வாங்கி இருக்கிறார் நடிகர் வடிவேலு.!

ஆனால் இயக்குநர் சிம்புதேவனுடன் பிரச்னை ,காட்சிகளில் தலையிடல் என பல சிக்கலை வடிவேலு ஏற்படுத்தியதாக தயாரிப்புத் தரப்பில் சொல்லப்பட்டது.

பல கோடிகளில் போடப்பட்ட செட்டுகளையும் கலைக்க வேண்டியதாகி விட்டது.

பேச்சு வார்த்தைகளும் பயன்படவில்லை. 

இதனால் தயாரிப்பாளர்கள் சங்கம் வடிவேலு நடிப்பதற்கு தடை போட்டது. 

பெப்சி தரப்பும் தயாரிப்பாளர்களுக்கு சாதகமாக இருப்பதாக தெரிவித்தது.

ஆனால் தடை இருப்பது தெரிந்தும், மாரி செல்வராஜ், சுராஜ்,ஷக்தி சிதம்பரம் ஆகியோர்  படங்களில் வடிவேலு நடிக்கப்போவதாக செய்திகள் வெளிவந்தன.

அதிகாரப்பூர்வமான செய்தியா என்பது தெரியாது.

இதற்கிடையில் வடிவேலுக்காக சமாதான  பேச்சில் சீமான் இறங்கி இருப்பதாக.சொல்கிறார்கள். 

ஒருவேளை ஷங்கரிடம் வாங்கிய பல கோடி முன்பணத்தை வடிவேலு திருப்பித்தர சம்மதம் தெரிவித்திருப்பாரோ என்னவோ! 

வடிவேலு மீண்டும் நடிப்பதற்கு வந்தால் சரி,!

ஆனால் தயாரிப்பாளர்கள் சங்கம் சம்பந்தப்பட்ட தயாரிப்பாளர்களை அழைத்து தடை இன்னும் நீக்கப்படவில்லை என்பதை சொன்னதாக தெரிகிறது.

ரஜினி-விஜயகாந்த் என்ன பேசினார்கள்?

காலை 11 மணி அளவில் சாலிகிராமத்துக்குள் சூப்பர்ஸ்டார் என்ட்ரி.

 ரஜினி வருவது முன்னதாகவே தெரிவிக்கப்பட்டிருந்ததால் வாசலில் வந்து வரவேற்றார் சுதீஷ்.

உள்ளே சென்றதும் கேப்டன் விஜயகாந்த் புன்னகைத்தபடியே கை கொடுத்தார்.

அருகில் பிரேமலதா விஜயகாந்த்.

"விஜி! எப்படிஇருக்கீங்க? என்று ரஜினி  கேட்டபடியே  பேசத் தொடங்கினார்.

அரைமணி நேர உரையாடல்.

சிங்கப்பூரில் டிரீட்மெண்ட் எடுத்த பிறகு ரஜினியும் அவ்வப்போது அமேரிக்கா சென்று செக் அப் செய்து கொள்வதால் இந்த சந்திப்பு. கேப்டனுக்கும் அதே சிகிச்சைதான்!

வெளியே வந்ததும் செய்தியாளர்களிடம் "நாங்கள் அரசியல் எதுவும் பேசவில்லை.அவரது அமெரிக்க சிகிச்சை பற்றி பேசினோம்.நான் சிங்கப்பூரில் சிகிச்சை பெற்று திரும்பிய பின்னர் முதலில் வந்து என்னை வந்து சந்தித்தவர் விஜயகாந்த்"என்று சொல்லிவிட்டு விடைப் பெற்றார் சூப்பர் ஸ்டார்.

தேமுதிகவுக்கு 5 இடங்கள் தர அதிமுக தயார்?

தமிழகத்தின் ஆள்கிற -எதிர்க்கிற கட்சிகளின் தலைவிதியை நிர்ணயிக்கிற தேர்தலாக வருகிற பாராளுமன்றத் தேர்தல் அமையும் என்பதில் எள்ளளவும் சந்தேகம் இல்லை.

மோடியை கடுமையாக கடைசி வரை எதிர்த்து வந்த அதிமுக தற்போது தலைவியை இழந்து எதிர்கொள்கிறது பாஜகவின் துணையுடன்!

இந்திய அரசியலில் முக்கிய சக்தியாக இருந்த கலைஞர் கருணாநிதி இல்லாமல் பழக்கப்பட கட்சிகளின் துணையுடன் சந்திக்கிறது தி.மு.க.

இந்த இரு பெரிய கட்சிகளின் தோள் மீது சவாரி செய்து பழக்கப்பட்ட ஏனைய கட்சிகள்.

இன்னும் பேச்சு வார்த்தை முற்றுப் பெறாத நிலையில் இரு அணிகள்.

அவர்களின் நோக்கமெல்லாம் விஜயகாந்தின் மீது.!

அந்த கட்சியின் ஆதரவு யாருக்கு இருக்கிறதோ அந்த கட்சிக்கு கூடுதலாக இடங்கள் கிடைக்கலாம். அது அவர் நேரடியாக களம் இறங்குவதை பொறுத்தது.

அதிமுக கூட்டணி அனேகமாக முடிவாகி விட்டதாகவே சொல்லலாம்.

பெருந்தொகை கை மாறி இருப்பதாகவும் சொல்கிறார்கள். ஆகவே பாமக கேட்கிற தொகுதிகளை விட்டுக்கொடுக்கிற நிலையில்தான் அதிமுக இருக்கிறது

21 தொகுதிகளுக்கான சட்டமன்ற இடைத் தேர்தலும் இணைந்தே நடத்தப்பட்டால் அந்த கட்சி கட்டாயம் அவைகளில் வெற்றி பெற்றாகவேண்டும்.

இல்லையேல் சட்ட மன்றத்தில் பெரும்பான்மை இல்லாமல் ஆட்சிக்கு ஆபத்து ஏற்படலாம்.

பெரும்பான்மையான தொகுதிகள் வட மாவட்டங்களில் வன்னியர் அதிகமாக வாழ்கிற பகுதியாகவே இருக்கிறது.ஆகவே இதை பாமக வசமாக பயன்படுத்துகிறது.

காரி உமிழாத குறையாக அதிமுகவை விமர்சித்தவர்கள் டாக்டர் ராமதாஸ் அன்புமணி ராமதாஸ் இருவரும்தான்.

அவர்களே இன்று அதிமுகவுடன் கூட்டணி வைக்கிறார்கள் என்றால் ...எந்த அளவுக்கு அவர்கள் மக்களை மதிக்கிறார்கள் என்பதை ஊகித்துக் கொள்ளலாம்.

தேமுதிகவுக்கு 5 தொகுதிகள் வரை கொடுப்பதற்கு அதிமுக தயாராக இருக்கிறது.

ஆனால் வேறு பல விஷயங்களில் தேமுதிக இணக்கமாக செல்ல விரும்பவில்லை.

பாமக கவனிக்கப்பட்ட அளவுக்கு இவர்களும் கவனிக்கப்பட வேண்டும் என்று விரும்புகிறார்கள்.

தேர்தலுக்குரிய செலவினங்களை இரண்டு பெரிய கல்வி நிறுவனங்களை சேர்ந்தவர்கள் ஏற்றுக் கொள்ளப்போவதாக  சொல்கிறார்கள்.

அதிமுகவுடன் சேர்வதை விட திமுகவுடன் சேருவதை தேமுதிக தொண்டர்கள் விரும்பினாலும் தலைமையில் உள்ளவர்களுக்கு மத்தியில் மந்திரி பதவி இலக்காக இருக்கிறது.

குறைந்த சீட்டுகளை ஒப்புக்கொள்வதாக இருந்தால் அமைச்சரவையில் இரண்டு இடங்களாவது தங்களுக்கு கொடுக்க வேண்டும் என்பதை வலியுறுத்துகிறது.

இந்த நிலையில்தான் கேப்டனை திமுக தலைவர் ஸ்டாலின் சந்தித்திருக்கிறார். தே.தி.மு.க தங்களின் கூட்டணிக்கு வராவிட்டாலும் அதன் தொண்டர்களில்  ஆதரவு தங்களுக்கு கிடைக்கலாம் என திமுக நம்புகிறது.

நீங்காத நினைவுகள். தொடர்.1

'கலைஞன்' படம்.

சிவாஜி பிலிம்ஸ் பேனர். ராம்குமார் கணேசன் தயாரிப்பு. உலகநாயகன் கமல்ஹாசன்,பிந்தியா ஆகியோர் நடித்த படம். சென்னை அண்ணாசாலையில் ஒரு பெரிய கட்டிடத்தில் படப்பிடிப்பு. முன்னெல்லாம் போன் செய்து விட்டு லொக்கேஷனுக்குப் போய் விடலாம். இடைவேளைகளில் நடிக நடிகையரை சந்தித்து பேட்டிகள் எடுக்கலாம். நெருக்கமான நட்பு நிலவிய காலம்.நடிகர்களும் நிறைய பேசுவார்கள்.

நான் படப்பிடிப்புத் தளத்துக்கு சென்றிருந்த போது 'தாண்டியா 'நடனக்காட்சியின் ஒரு பகுதியை படமாக்கிக் கொண்டிருந்தனர்.

மதியம் லஞ்ச் இடைவேளை.

வழக்கம் போல நடிகர் திலகத்தின் வீட்டிலிருந்து 'விருந்து' வந்தது. மட்டன் சிக்கன்,இறால்,மீன் ,காடை ,நண்டு,இப்படி பல வகைகள். விருப்பம் போல வெளுத்துக் கட்டலாம்.

கமல் வீட்டிலிருந்தும் நான்-வெஜ்..

"கருவாடு சாப்பிடுறிகளா?"  கமல் கேட்டார்.

"ம்ம்.சாப்ட்டு ரொம்ப வருசமாச்சு.மதுரையில் வீட்டில் சாப்பிட்டது."

"இது  நம்மூரு கருவாடுதான்! ராம்நாடில் இருந்து வந்திருக்கு! சாப்பிடுங்க!"

தொக்கு மாதிரி வைத்திருந்தார்கள்.. ருசி செம!

"ஜி! நீங்க நான்-வெஜ் ல என்னென்ன சாப்பிட்டிருக்கீக?"

"நடப்பன பறப்பன ஊர்வன இப்படி எல்லாமே இந்த வயசில சாப்பிடலேனா வேற எந்த வயசில சாப்பிட முடியும்?" என்றார்.

அவரது இளமையின் ரகசியம் புரிந்தது. 

காட்சியை கட் பண்ணுங்க.

அப்படியே அன்னை இல்லத்துக்கு வாங்க.!

நடிகர் திலகம் வரச்சொல்லி இருந்தார். போனேன்.

வீட்டு நலன்களை வழக்கம் போல விசாரித்து விட்டு "ஒழுங்கா இருக்கியா?".

இந்த கேள்வியின் அர்த்தம் நம்மைப் பற்றி யாரோ வத்தி வைத்திருக்கிறார்கள் என்பதுதான்!

சற்று பதட்டமுடன் "இருக்கேண்ணே!"

"மதுரையில இருந்தபோது ஒழுங்காத்தானே இருந்தே மெட்ராஸ் வந்தபிறகுதான் இப்படி ஆகிட்டியா?கண்டபடி எழுதுறியாமே...அதுக்கு பேரு என்னமோ சொல்றாய்ங்களே ..அதாண்டா கிசு கிசு."

"அண்ணே...எல்லாருமே எழுதுறாய்ங்கண்ணே.பத்திரிக்கை சேல்ஸ் இங்கிரீஸ் ஆகும்."

"மண்ணாங்கட்டி!.அதுக்காக மத்தவன் வயித்தெரிச்சலை வாங்கிக்கட்டிக்கிவியா.?நாலு பேரு வாயில ஏண்டா விழணும்?நம்ம புள்ள குட்டி நல்லாருக்கும்னுடா! சொல்றது  புரியிதா?" 

தலையாட்டினேன்.

இப்படி என்னிடம் உரிமை எடுத்துக் கொண்டு கண்டித்து திருத்தியவர்களில் நடிகர் திலகம்,உலகநாயகன்,திரையுலக மார்க்கண்டேயன் ஆகிய மூவருக்கும் பங்கு உண்டு,

இப்படியாக அண்ணன் சிவாஜி என்னை கண்டித்துக் கொண்டிருந்தபோது  அவ்வழியே எங்களை கடந்த இளைய திலகம் பிரபு "அப்பா ,ஹார்ஸ் ரைடிங்  போறேன்பா!"என்று தகவல் சொல்லிவிட்டு சென்றார்.

அவர் சென்றதும் அண்ணனின் மூடு மாறி விட்டது.

"இவனும் உடம்பு இளைக்கனும்னு அடிக்கடி குதிரை சவாரி பண்றான். குதிரைதான் இளைச்சது,இவன் இளைச்சமாதிரி தெரியல "என்று சொன்னதும் வந்த சிரிப்பை அடக்கிக் கொண்டேன். நைசாக அப்படியே விடை பெற்று  கிளம்பிவிட்டேன். 

சிவாஜி சொன்னதின் எதிரொலியோ என்னவோ பிரபுவுக்காக  "கத்திரிக்கா...குண்டு கத்திரிக்கா" என்று பாடலும் எழுதி விட்டார்கள். 

உடல் பருமன் என்பது அவர்களது வம்சாவளி  சொத்து.

நடிகர் திலகத்தைப் பற்றி பலர் கஞ்சன் என்பார்கள். ராமநாதபுரம் வறட்சியால் பாதிக்கப்பட்டபோது நேரிலும் அவரது மன்றங்கள் வழியாகவும் அந்த காலத்து மதிப்புப்படி பல லட்சங்கள் செலவு செய்து குடிதண்ணீர் குழாய்கள் அமைத்துக் கொடுத்திருக்கிறார்.கண்மாய்களை சீரமைத்துக் கொடுத்திருக்கிறார்.

கமலுடன் பிரபு உடற்பயிற்சி செய்வதாக ஒரு செய்தி கிடைத்தது. அதை நாளை மறுநாள் சொல்கிறேன்.